स्याङ्जा ।

स्याङ्जाको हरिनास गाउँपालिका–५ का पूर्ववडाध्यक्ष डण्डबहादुर रानाको घर हटाउन अख्तियार दुरुपयोग अनुसन्धान आयोगको कार्यालय पोखराले निर्देशन दिएको छ । सार्वजनिक जग्गा हडपेर घर बनाएको देखिएपछि अख्तियारले उक्त निर्देशन दिएको हो ।

स्याङ्जा जिल्ला साविक चिन्नेबास गाविस–७ को हाल हरिनास गाउँपालिका–५ को कित्ता नं. ५३७ को सार्वजनिक जग्गा हडपेर घर बनाएको आरोप लागेपछि अख्तियारले घर हटाउन निर्देशन दिएको छ । स्थानीय तह निर्वाचन २०७४ मा राना एमालेबाट उक्त वडाको वडाध्यक्ष बनेका थिए ।

उक्त कित्ताको जग्गा जंगल जनिएको भन्दै अख्तियार कार्यालयले घर हटाउन निर्देशन दिएको जनाएको छ । बनेको पक्की तथा कच्ची संरचना हटाउन जिल्ला प्रशासन कार्यालय र सरकारी, सार्वजनिक सम्पत्ति संरक्षण गर्न हरिनास गाउँपालिकालाई अख्तियारले जारी गरेको निर्देशनात्मक पत्रमा उल्लेख गरिएको छ ।

अख्तियारले आफ्नो ऐन, २०४८ को परिच्छेद–६ अन्तर्गत दफा २८ अनुसार आयोगले सुझाव दिन सक्ने उपदफा ‘ख’ बमोजिम गएको माघ ९ गते उक्त निर्देशन दिएको हो । अख्तियारले पत्रमा निर्देशन तत्काल कार्यान्वयन गरी जानकारी गराउनसमेत भनेको छ ।

वडाध्यक्ष बनेपछि रानाले डोजर खरिद गरेर गाउँपालिकाअन्तर्गत काम गरेर अवैध रूपमा अकुत कमाएको स्थानीयले आरोप लगाएका छन् । पालिका र वडामा आफ्नै सरकार बनेको भन्दै उनले एकलौटी काम गरेर अकुत आर्जन गरेको स्थानीयको आरोप छ ।

उता उनै पूर्व वडाध्यक्ष रानाले अवैध ढुंगाखानी सञ्चालन गरेको स्थानीयले बताएका छन् । अबैध ढुंगाखानीबाट ढुंगा निकालेर तनहुँको दुलेगौँडा, पाल्पाको रामपुर र पोखरामा अवैध निकासी गर्दै आएको स्थानीयले बताए ।

२०७४ देखि २०७९ को ५ वर्ष अवधिमा बंगुर फार्म खोलेर रानाले गाउँपालिकाबाट कृषि अनुदान हत्याएको पालिका स्रोतले जनाएको छ । पालिका स्रोतका अनुसार बंगुर फार्मका नाउँमा उनले बर्सेनि ३ देखि ५ लाख रुपैयाँ कृषि अनुदान लिएको बताइएको छ ।

गाउँपालिकाका अध्यक्ष खिमबहादुर मानन्धर र पूर्ववडाध्यक्ष रानाविरुद्ध अख्तियारमा दर्जनौँ उजुरी दर्ता भएको स्रोतले नाम उल्लेख नगर्ने सर्तमा जनाएको छ । दर्जनौँ उजुरी दर्ता भएको र उजुरी उपर छानबिन गरी कारबाहीको प्रक्रियासमेत अघि बढेको छ ।